पुणे : ‘दिवाळी पहाट’ संस्कृतीची सुरुवात करणाऱ्या त्रिदल-पुण्यभूषण फाउंडेशनतर्फे आयोजित सत्ताविसावी दिवाळी पहाट रविवारी, २७ ऑक्टोबर रोजी पहाटे साडेपाच वाजता बालगंधर्व रंगमंदिरात रंगणार आहे.
सूर-ताल-नृत्य-गायन यांचा संगम असणाऱ्या ‘दीप-सूर तेजाळती’ नावाच्या या मैफलीत पं. राकेश चौरसिया यांचे बासरीवादन, पं. विजय घाटे यांचा तबला, शीतल कोलवालकर यांचे कथक नृत्य, श्रीधर पार्थसारथी यांचे मृदंगवादन, सुरंजन रघुनाथ यांचे गायन आणि श्रीराम हसबनीस यांचे हार्मोनियमवादन रसिकांना ऐकता येणार आहे.
या वेळी शंभर वर्षे पूर्ण केलेल्या पुण्यातील दी पूना प्रेस ओनर्स असोसिएशन लिमिटेड, डेक्कन एज्युकेशन सोसायटी, महात्मा फुले वसतिगृह, डेक्कन मुस्लिम लायब्ररी आणि कँप एज्युकेशन सोसायटी या संस्थांचा सत्कार करण्यात येणार आहे.
याबाबत अधिक माहिती देताना त्रिदल-पुण्यभूषण फाउंडेशनचे अध्यक्ष डॉ. सतीश देसाई म्हणाले, दिवाळी पहाटचा कार्यक्रम करण्यास प्रथम त्रिदलने १९९२पासून सुरुवात केली. आता विदेशातही मराठी लोक दिवाळी पहाट कार्यक्रम करू लागले आहेत. संस्थेने या कार्यक्रमाचे वेगळेपणही जपले आहे. यात पाच पुणेकरांचा ‘पक्के पुणेकर’ असा सन्मान केला जातो. गायिका किशोरी आमोणकर ते पंडित जसराज यासारख्या दिग्गज कलाकारांनी ही मैफल सजवली आहे. या वर्षीदेखील नावाजलेल्या कलाकारांच्या सादरीकरणाचा आस्वाद रसिकांना घेता येणार आहे.’
या कार्यक्रमासाठी बाल्कनीतील प्रवेश विनामूल्य असून, तेथे प्रथम येणाऱ्यास प्रथम प्राधान्य या तत्त्वावर प्रवेश दिला जाणार आहे.
